ການສື່ສານ (Communication)

ການສື່ສານ ແມ່ນວິທີທີ່ເຮົາແບ່ງປັນ ຂໍ້ມູນຂ່າວສານ (information) ໃຫ້ຄົນອື່ນ. ມັນແມ່ນການສົ່ງຂໍ້ຄວາມຈາກຄົນໜຶ່ງ (ຜູ້ສົ່ງ) ໄປຫາອີກຄົນໜຶ່ງ (ຜູ້ຮັບ) ຜ່ານຊ່ອງທາງພິເສດທີ່ເອີ້ນວ່າ: ສື່ (medium).

ຄົນເຮົາ ສາມາດສື່ສານກັນໄດ້ຫຼາຍວິທີ:

• ການສື່ສານດ້ວຍການເບິ່ງ: ໃຊ້ສາຍຕາ ເຊັ່ນ: ພາສາກາຍ (body language) ຫຼື ທ່າທາງ (gestures).
• ການສື່ສານດ້ວຍສຽງ: ລວມທັງ ພາສາ (language) ຂອງມະນຸດ ແລະ ສຽງອື່ນໆ ເຊັ່ນ: ໝາ (dog) ເຫົ່າ.
• ການສື່ສານດ້ວຍການສຳຜັດ: ສົ່ງຂໍ້ຄວາມຜ່ານການສຳຜັດ.
• ການສື່ສານດ້ວຍກິ່ນ: ໃຊ້ກິ່ນເພື່ອສົ່ງຂໍ້ຄວາມ.
• ການສື່ສານດ້ວຍການຂຽນ: ແບ່ງປັນຄວາມຄິດຜ່ານ ການຂຽນ (writing).

ການສື່ສານອາດເປັນແບບເວົ້າ ເຊັ່ນ: ເວົ້າຄຳໜຶ່ງອອກມາ ຫຼື ແບບບໍ່ເວົ້າ ເຊັ່ນ: ການຍິ້ມ (smile). ມັນເກີດຂຶ້ນຕະຫຼອດເວລາ ແລະ ໃນຫຼາຍຮູບແບບ. ບໍ່ແມ່ນແຕ່ມະນຸດເທົ່ານັ້ນທີ່ສື່ສານ ແຕ່ ສັດ (animals) ສ່ວນໃຫຍ່ກໍສື່ສານເຊັ່ນກັນ. ການສື່ສານບາງຢ່າງເກີດຂຶ້ນໂດຍທີ່ເຮົາບໍ່ທັນຄິດ ເຊັ່ນ: ການປ່ຽນທ່າທາງຂອງຮ່າງກາຍ (posture).

ເມື່ອການສື່ສານພະຍາຍາມປ່ຽນຄວາມຄິດຂອງຄົນ ມັນອາດເອີ້ນວ່າ: ການຊັກຊວນ (persuasion) ຫຼື ການໂຄສະນາຊວນເຊື່ອ (propaganda).

ຮູບພາບ: ການສື່ສານ ປະກອບມີ: ການສົ່ງຂໍ້ຄວາມຈາກຄົນໜຶ່ງ (ຜູ້ສົ່ງ ຫຼື Sender) ໄປຫາອີກຄົນໜຶ່ງ (ຜູ້ຮັບ ຫຼື Receiver) ຜ່ານຊ່ອງທາງພິເສດທີ່ເອີ້ນວ່າ: ຂໍ້ຄວາມ (Message).

ການສື່ສານເຮັດວຽກແນວໃດ (How Communication Works)

ການສື່ສານເກີດຂຶ້ນຈາກການສົ່ງ ແລະ ຮັບຂໍ້ຄວາມ. ສາມາດເຂົ້າໃຈແບບງ່າຍໆໄດ້ດັ່ງນີ້:

• ຜູ້ສົ່ງສ້າງຂໍ້ຄວາມຈາກຄວາມຄິດໃນໃຈ ເຊິ່ງເອີ້ນວ່າ: ການເຂົ້າລະຫັດ (encoding).
• ຈາກນັ້ນ ຜູ້ສົ່ງກໍສົ່ງຂໍ້ຄວາມຜ່ານຊ່ອງທາງໃດໜຶ່ງ ເຊັ່ນ: ການເວົ້າ ຫຼື ການຂຽນ.
• ຜູ້ຮັບໄດ້ຮັບຂໍ້ຄວາມ ແລ້ວເຂົ້າໃຈມັນ ເຊິ່ງເອີ້ນວ່າ: ການຖອດລະຫັດ (decoding).

ນອກຈາກຕົວຂໍ້ຄວາມແລ້ວ ຍັງມີອີກຫຼາຍຢ່າງທີ່ສຳຄັນຕໍ່ການສື່ສານທີ່ດີ:

• ໃຜເປັນຜູ້ເວົ້າ? ລາວມີບົດບາດ ຫຼື ສະຖານະແນວໃດ?
• ຂໍ້ຄວາມມັກມາພ້ອມກັບຂໍ້ຄວາມອື່ນໆ ເຊິ່ງເຮົາກໍເຂົ້າໃຈໄປນຳໂດຍອັດຕະໂນມັດ.

ເພື່ອໃຫ້ຂໍ້ຄວາມຊັດເຈນ ຜູ້ສົ່ງ ແລະ ຜູ້ຮັບຕ້ອງຕົກລົງກັນກ່ຽວກັບຄຳສັບທີ່ໃຊ້ ເພື່ອບໍ່ໃຫ້ເກີດຄວາມສັບສົນ. ຕົວຢ່າງ: ຄຳວ່າ “hedge” ໃນພາສາອັງກິດມີຄວາມໝາຍໄດ້ຫຼາຍຢ່າງ ມັນອາດໝາຍເຖິງແຖວພຸ່ມໄມ້, ວິທີຫຼຸດຄວາມສ່ຽງທາງການເງິນ ຫຼື ຄຳທີ່ເຮັດໃຫ້ຖ້ອຍຄຳອື່ນຟັງແລ້ວບໍ່ໜັກແໜ້ນ. ຖ້າບໍ່ມີຂໍ້ມູນເພີ່ມເຕີມ ກໍຍາກທີ່ຈະຮູ້ວ່າຄົນນັ້ນໝາຍເຖິງ hedge ແບບໃດ.

ຂໍ້ຄວາມແມ່ນຫຍັງກັນແທ້? (What Exactly Is a Message?)

ຂໍ້ຄວາມ (message) ແມ່ນການສື່ສານຫົວໜ່ວຍໜຶ່ງ. ມັນອາດເປັນຂໍ້ມູນ, ຂໍ້ເທັດຈິງ, ຄວາມຄິດເຫັນ, ຄວາມຮູ້ສຶກ, ເລື່ອງເລົ່າ, ຂ່າວ ຫຼື ແນວຄິດ. ຂໍ້ຄວາມສາມາດໃຊ້ຖ້ອຍຄຳ (ແບບໃຊ້ຄຳເວົ້າ) ເຊັ່ນ: ອີເມວ (email).

ຂໍ້ຄວາມຍັງເປັນແບບບໍ່ໃຊ້ຖ້ອຍຄຳ (non-verbal) ໄດ້ ຄືບໍ່ມີຄຳເວົ້າເລີຍ ເຊັ່ນ: ອີໂມຈິ (emojis). ອີໂມຈິ ສາມາດສະແດງ ສີໜ້າ (facial expression) ຫຼື ທ່າທາງມື (hand gesture).

ບາງຄັ້ງ ສີໜ້າ ແລະ ທ່າທາງມືກໍຖືກໃຊ້ຮ່ວມກັນ ຄືກັບອີໂມຈິນີ້:

ຮູບພາບ: ອີໂມຈິ (emoji).

ການສື່ສານແບບບໍ່ໃຊ້ຖ້ອຍຄຳ (Non-verbal Communication)

ປ້າຍ (Signs) ແລະ ສັນຍາລັກ (symbols) ເປັນການສື່ສານແບບບໍ່ໃຊ້ຖ້ອຍຄຳຊະນິດໜຶ່ງ. ຕົວຢ່າງ:

ຮູບພາບ: ປ້າຍຈາລະຈອນຂອງໄທ (ຕ-9): ປ້າຍນີ້ໝາຍຄວາມວ່າຂ້າງໜ້າເປັນທາງໂຄ້ງຄົດ. (Thailand road sign ต-9, Winding road ahead).

ຮູບພາບ: ທຸງ “ນັກດຳນ້ຳຢູ່ໃຕ້ນ້ຳ” (Diver Down): ທຸງສັນຍາລັກນີ້ໝາຍຄວາມວ່າມີນັກດຳນ້ຳສະກູບ້າຢູ່ໃຕ້ນ້ຳ. (Diver Down flag-Pavillon signalant la présence de plongeurs sous l’eau).

• ອັກສອນເບຣລ໌ (Braille): ລະບົບການອ່ານ ແລະ ຂຽນແບບ “ສຳຜັດ” ສຳລັບຄົນຕາບອດ. ຈຸດນູນທີ່ຍົກຂຶ້ນມາແທນຕົວອັກສອນໃນຕົວໜັງສື.

ພາສາກາຍ (Body Language)

ເວລາຄົນເຮົາລົມກັນ (conversation) ເຮົາໃຊ້ສີໜ້າ ແລະ ທ່າທາງມືຫຼາຍຢ່າງ. ສິ່ງນີ້ເອີ້ນວ່າ: ພາສາກາຍ (body language).

ທ່າທາງມື ອາດມີຄວາມໝາຍຕ່າງກັນໃນແຕ່ລະປະເທດ. ເພື່ອບໍ່ໃຫ້ເກີດຄວາມເຂົ້າໃຈຜິດ ຄວນຮູ້ກ່ອນວ່າທ່າທາງມືໃດໝາຍຄວາມວ່າແນວໃດ ກ່ອນໄປຢ້ຽມຢາມປະເທດອື່ນ ຫຼື ລົມກັບຄົນຈາກປະເທດນັ້ນ.

ພາສາມື (Sign language) ແມ່ນພາສາທີ່ຄົນຫູໜວກໃຊ້ ແລະ ໃຊ້ກັບຄົນຫູໜວກ. ມັນເປັນການສື່ສານແບບບໍ່ໃຊ້ສຽງເວົ້າ ໂດຍປະສົມປະສານທ່າທາງມື, ສີໜ້າ ແລະ ການເຄື່ອນໄຫວຮ່າງກາຍເພື່ອສະແດງຄຳເວົ້າ. ມັນຖືກໃຊ້ຄຽງຄູ່ກັບການສະກົດນິ້ວມື ເຊິ່ງທ່າທາງມືແຕ່ລະແບບແທນຕົວອັກສອນໃນຕົວໜັງສື. ຄົນຫູໜວກບາງຄົນຍັງສາມາດ “ອ່ານປາກ” ຂອງຄົນທີ່ກຳລັງເວົ້າໄດ້ອີກດ້ວຍ.

ການສື່ສານຜ່ານສິລະປະ (Communication Through Art)

ດົນຕີ ແລະ ສິລະປະສາມາດສົ່ງຄວາມຮູ້ສຶກໄດ້ (emotional) ແລະ ຖືເປັນຮູບແບບການສື່ສານຢ່າງໜຶ່ງ.

ເພງເພງໜຶ່ງສາມາດລວມເນື້ອຮ້ອງ (ຖ້ອຍຄຳ) ເຂົ້າກັບສຽງຮ້ອງ ຫຼື ເຄື່ອງດົນຕີ (instruments) ເຊິ່ງສົ່ງຄວາມຮູ້ສຶກໄດ້ຫຼາກຫຼາຍ.

ປຶ້ມກາຕູນ (comic book) ສາມາດມີທັງຄຳເວົ້າ ແລະ ຮູບພາບເພື່ອເລົ່າເລື່ອງໄດ້.

ຮູບພາບ: ເດັກຊາຍກຳລັງອ່ານມັງງະ (An asian boy reading GRAPHiC N0VEL in a Barnes & Noble bookstore in West Hartford, Connectiicut).

ສື່ກາງການສື່ສານ (Communication Media)

ວິທີສົ່ງຂໍ້ຄວາມເອີ້ນວ່າ: “ສື່” (medium). ຍົກຕົວຢ່າງ:

ສື່ເອເລັກໂຕຣນິກ	ສື່ທີ່ບໍ່ແມ່ນເອເລັກໂຕຣນິກ
ອີເມວ	ຈົດໝາຍທາງໄປສະນີທຳມະດາ
ຂໍ້ຄວາມໂທລະສັບ (SMS)	ໜັງສືພິມ (Newspaper)
ການກະຈາຍສຽງທາງວິທະຍຸ (Radio broadcast)	ປຶ້ມ
ປຶ້ມເອເລັກໂຕຣນິກ (E-Book)	ເດັກນ້ອຍອໍ້ແອ້ຢູ່ເທິງຕັກ
ຂ່າວດິຈິຕອນ	ການຈັບມື

ແຫຼ່ງຂໍ້ມູນ: ແປ ແລະ ຮຽບຮຽງມາຈາກ https://kids.kiddle.co/Communication